නිශාන්තයේ..

සිසිබිඹු මරකත මිණි වැණි දිය මත බබළන නිසසල නිශාන්තයේ

සිසිබිඹු මරකත මිණි වැණි දිය මත බබළන නිසසල නිශාන්තයේ

අරුණළු දසුනට කුසුම් කැකුළු වැද මීහිලිය සැරසෙන නිශාන්තයේ
අරුණළු දසුනට කුසුම් කැකුළු වැද මීහිලිය සැරසෙන නිශාන්තයේ

තරු කැට නෙතු හැර ගගන තලා මැද නිහඬව සැනහෙන නිශාන්තයේ
තරු කැට නෙතු හැර ගගන තලා මැද නිහඬව සැනහෙන නිශාන්තයේ

පැහැදුල් මිණි පහනෙක දැල් නිවි නිවි අඳුරත වියැකෙන නිශාන්තයේ
පැහැදුල් මිණි පහනෙක දැල් නිවි නිවි අඳුරත වියැකෙන නිශාන්තයේ

මුල් පද - සඳුන් නාගහවත්ත
මුල් සංගීතය - නාලක දිසානායක

පස්සෙ අතින් දාපු සංගීතය සහ පද මගේ වේ යැ..

වියෝ වූ මලක්..

දාර වැස්සට මූණ තෙමුනම - කඳුලු කැට ටික සේදුනා

පීර බැලුවට සෙයිලමේ කොන - ලඟම අහුමුළු නොපෙනුනා

පාට දැක්කට දේදුන්න අග  - ඉරගින්නෙ රත බැබළුනා

රූපෙ දුටුවට නාරි ඇඳුමින් - ධවල ඔසරිය මතුවුනා..

ආල දෑසට රූප රාජිනි - දේහෙ අද මැද පරවෙලා

රෝස අතැඟිලි දිගටි අත්ලක - පීන පහලින් මැලවෙලා

කාරි නොදොඩන නාදළු මත - රක්ත සායම් තැවරිලා 

මීන නෙත්වල දෝස යන්නට - අඳුන් පැතිරව පියවිලා..

පිපුන පරවුන සිහින මල්ගොමු - දෙණ යහන මත වැතිරිලා

කේතු සෙනසුරු ගුරු මාරු දැක - සිකුරු පහනක දැල්විලා

පවට වැනසුන බඹර ගල උඩ - මලක පෙතිහැර පාවුනා

වෘක්ෂ නා මත වැතිර පැතිරුන - සඳුන් වැල අද මියැදිලා..

ප්‍රසන්න මධුර සුඛං

තැබූ තැබූ තැන අවදිවු බර අවි

පිදූ පිදූ තැන පරවුන මල් පෙති       

පිරූ පිරූ දස පෙරුමන් නැතිවුන

ප්‍රසන්න මධුර සුඛං

බුරා බුරා නැගෙනා ඒ බොදුගිනි

වෙලා වෙලා දැවෙනා ඒ ගිනිකෙලි 

දිරූ දිරූ ඒ බෝසත් පිලිරුව

වණ්ණෝ සුඛං බලං

දෙසූ දෙසූ දම්සක් වී පැමිණිලි

පිසූ පිසූ දන්සල් වී ඇවටිලි

ගැලූ ගැලූ  දස සිල්දිය බොරවුන

ගිලන පච්චං ඉමං සුඛං

ජීවිතය නම් වේදනාව

ලිපගිනි මෙලවෙන තෙක් දිය      සැලියේ
සැපයක් නම් කකුළුවා දිය         කෙලියේ
අවදිව පෙරයම තෙක් දිවි             මළුවේ

සේපාලික මල අඳුරෙම                නැසුනේ

අව්වට වැස්සට හුරු               මිනිසුන්ගේ
දහඩිය ඇයි කන්තෝරුවෙ         නැසුනේ
කරමත ඇවිලෙන මරගිනි              අතරේ
පොලවට නුසුලන තව බර          වැටුනේ

සිල්වත දිදුලන වැලිතල                 අතරේ
පඬුපැහැ කිරි කලයට මුසු         කෙරුනේ
ගිනි අවි බිඳ යදමින් සිර                 ඇතුලේ
ඇවිලුන ගිනිදැල් කඳුලින්              නිමුනේ

වැඩ කරන්නෙ නැති.

වැඩ කරන්නෙ නැති,
හදන්න සල්ලිත් නැති,
නැතිවුනොත් කම්ප්ලේන් යන, 
කම්ප්ලේන් ගියොත් සල්ලි නැතිවෙන,
සල්ලි නැතිවුනොත් හදන්න බැරිවෙන,
මේ කාර් එකේ ඒසී එක.